Бишкек, 19.01.26 /Кабар/. Эмгек, социалдык камсыздоо жана миграция министрлиги экономика тармактары боюнча орточо эмгек акынын өлчөмүн билдирди.
Мекеме Улуттук статистика комитетинин маалыматтарына таянып, эң жогорку орточо айлык акы финансы секторунда — 67 121 сом экенин белгиледи. Өнөр жай тармагындагы көрсөткүчтөр да дээрлик ушул деңгээлде — орточо эмгек акы 66 990 сомду түзөт.
Транспорт тармагында кызматкерлер орточо эсеп менен 58 657 сом, курулушта — 57 472 сом алышат. Соода тармагындагы орточо айлык 47 125 сомду, ал эми айыл чарбасында — 33 462 сомду түзөт.
Республикалык орточо көрсөткүчтөн төмөн болгон кирешелер тейлөө чөйрөсүндө — 29 679 сом, саламаттыкты сактоо жана социалдык кызмат көрсөтүүдө — 28 082 сом, билим берүү тармагында — 27 054 сом деп катталган. Эң төмөнкү орточо эмгек акы маданият тармагында байкалат — 24 861 сом.
Эмгек министрлиги жарандар бош жумуш орундары жана ишке орношуу мүмкүнчүлүктөрү тууралуу кененирээк маалыматты аймактык иш менен камсыз кылуу кызматтарынан ала алышарын эскертти.
