Бишкек 18.04.25 /Кабар/. Финансы министрлиги бүгүн өлкөнүн 2024-жыл үчүн республикалык бюджетинин аткарылышы жөнүндө отчетунун коомдук угуусун уюштурду.
Ага министрликтер жана ведомстволордун өкүлдөрү, Финансы министрлигинин башкармалыктарынын жетекчилери катышты.
Отчеттук иш-чаранын таанытымын финансы министринин орун басары - Борбордук казыналыктын директору Үмүтжан Аманбаев жасап, кенен маалымат берди.
Үмүтжан Аманбаевдин айтымында, өлкөдө жана анын бардык секторлорунда реалдуу реформалар, экономикалык жактан туруктуу өнүгүү болуп, мунун натыйжасында жакшы жыйынтыктар чыгууда.
"2024-жылдын жыйынтыты боюнча ИДПнын номиналдык көлөмү 1 трлн 523 млрд сомду түзүп, өсүшү 9%ды түздү. Бул 2020-жылга салыштырмалуу 2,5 эсеге өстү. Бул абдан жакшы көрсөткүч. Биздин алдыдагы планыбыз - муну 2030-жылдарга карата дагы 2,5 эсеге жогорулатуу. 2024-жылдагы калктын жан башына ИДПсы 2431 доллар өлчөмүндө болгон.
Ошондой эле “Кыргызстандын 2024-жылдагы консолидацияланган бюджети 688,8 млрд сомду түзгөн. Ал эми 2025-жылга 708,9 млрд сом өлчөмүндө деп пландаштырылган”, - деди Аманбаев.
