Бишкек, 05.09.25 /Кабар/. Кыргызстан эл аралык тажрыйбага негизделген, бирок улуттук өзгөчөлүктөргө ээ болгон уникалдуу моделди колдонуу менен хоккейди өнүктүрүүнү пландоодо. Бул тууралуу “Кабар” агенттигинде өткөн маалымат жыйынында Ат-Башы хоккей лигасынын президенти Талант Бокешов билдирди.
"Дүйнөдө орус хоккейи, канадалык хоккей, чех хоккейи деген түшүнүк бар - ар биринин өзүнүн өзгөчөлүктөрү бар. Биз ар кайсы өлкөлөрдүн тажрыйбасына таянып, кыргыз хоккей стилин түзгүбүз келет", - деди ал.
Анын айтымында, хоккей улуттук көк бөрү оюнуна көп жагынан окшош.
"Кыргыздарда хоккейдик, аскердик рух бар. Бекеринен "Хоккей чыныгы мырзалардын спорту" деп айтышпайт", - дейт Бокешов.
Ал белгилегендей, хоккей кымбат спорт түрү бойдон калууда, бир гана жабдууларга эмес, муз аянтчаларын тейлөөгө да олуттуу каражат талап кылынат.
"Ат-Башыда суук 7-8 айга созулат. Башка мамлекеттердин тажрыйбасын изилдеп, муз толтурууну, такталарды орнотууну үйрөндүк. Ат-Башыда буга чейин 5 хоккей аянтчасы курулган. Мындан сырткары аймактардан балдарды машыктырып, республикалык мелдештерге алып келебиз", - деп кошумчалады Ат-Башы лигасынын президенти.
