Бишкек, 25.08.25. /Кабар/. Бүгүн Эмгек, социалдык камсыздоо жана миграция министрлигинде жаңы социалдык кызматкерлер үчүн беш күндүк окутуу башталды. Бул тууралуу ведомстводон маалымдашты.
Иш-чарага эмгек министри Равшанбек Сабиров жана БУУнун Балдар фондунун (ЮНИСЕФ) Кыргызстандагы өкүлү Самман Тапа катышты.
Окутуу КР президентинин "Балдарды социалдык коштоо боюнча социалдык кызматкерлер жөнүндө" жарлыгынын алкагында өткөрүлүп, мамлекеттик коргоого муктаж балдар менен иштеген адистердин билимдерин жана көндүмдөрүн чыңдоого багытталган.
Социалдык кызматкерлерди этап-этабы менен ишке алуу иши өлкө боюнча жүргүзүлүүдө. Бүгүнкү күндө анын алгачкы эки этабы ийгиликтүү жыйынтыкталып, 280 адис ишке алынган. Жалпысынан жарлыкка ылайык 550 социалдык кызматкер жумушка кабыл алынып, бул социалдык коргоо системасын өнүктүрүүдө жана турмуштук оор кырдаалдагы балдар менен үй-бүлөлөргө көрсөтүлүп жаткан жардамдын сапатын жогорулатуунун маанилүү кадамы болуп саналат.
"Социалдык кызматкерлер эң алдыңкы сапта туруп, балдарга жана үй-бүлөлөргө кыйынчылыктарды жеңүүгө көмөктөшөт. Министрлик социалдык кызматкерлердин квалификациясын жогорулатуу, статусун бекемдөө, келечекте эмгек акыны жогорулатуу үчүн шарттарды түзүү боюнча иштерди улантат", - деди министр.
Окутуу адистерге тажрыйба алмашууга, жаңы ыкмаларды жана куралдарды өздөштүрүүгө, ошондой эле балдар жана үй-бүлөлөр менен иштөөдөгү актуалдуу маселелерди талкуулоого шарт түзүп, заманбап жана натыйжалуу социалдык коргоо системасын чыңдоого өбөлгө болот.
