2026-жылдын июль айында Пакистандын президенти Асиф Али Зардари президент Садыр Жапаровдун чакыруусу менен Кыргызстанга расмий сапар менен келип, бул Пакистан мамлекетинин башчысынын республикага акыркы 20 жыл ичиндеги алгачкы сапары болду. Эки өлкөнүн лидерлеринин жолугушуусу Ысык-Көлдө өттү. Бул сапар 2025-жылдын декабрында Садыр Жапаровдун Пакистанга жасаган мамлекеттик сапарынан кийин кыйла активдешкен кыргыз-пакистан мамилелеринин уландысы болду. Анда тараптар кызматташуунун кеңири багыттарын гана белгилебестен, эки тараптуу маанилүү документтердин пакетине да кол коюшкан. Эми бул макулдашуулар Кыргызстандын аймагында эки мамлекеттин башчыларынын деңгээлинде улантылды.
Кыргызстан менен Пакистан үчүн мамилелердин азыркы этабы өзгөчө мааниге ээ. Эки өлкөнү тарыхый жана маданий байланыштар, аймактык жана эл аралык кызматташтыктын алкагындагы жалпы кызыкчылыктар, ошондой эле соода-экономикалык, транспорттук, энергетикалык, инвестициялык жана гуманитардык тармактардагы өз ара аракеттенүүнүн өсүп жаткан мүмкүнчүлүктөрү байланыштырып турат.
Мында сөз соода көлөмүн гана көбөйтүү менен чектелбеген кыйла кеңири күн тартиби жөнүндө болуп жатат. Кыргызстан менен Пакистан Борбордук жана Түштүк Азиянын ортосунда жаңы транспорттук байланыштарды түзүү, энергетика тармагындагы кызматташтыкты өнүктүрүү, биргелешкен долбоорлорду ишке ашыруу жана ишкер чөйрөлөрдүн, билим берүү мекемелеринин жана мамлекеттик түзүмдөрдүн ортосундагы байланыштарды кеңейтүү мүмкүнчүлүктөрүн карап жатышат.
Өз ара аракеттенүүнүн маанилүү багыты катары эл аралык уюмдардын аянтчаларындагы кызматташтык да каралууда. Быйыл Кыргызстан Шанхай кызматташтык уюмуна (ШКУ) төрагалык кылууда жана 2026-жылдын күзүндө Бишкекте уюмга мүчө мамлекеттердин башчыларынын саммити өтөт. Ушул маанилүү иш-чаранын алкагында президент Садыр Жапаров Пакистандын премьер-министри Шахбаз Шарифти Бишкекке ардактуу конок катары келип кетүүгө, ошондой эле VI Дүйнөлүк көчмөндөр оюндарына жана Кыргызстандын Эгемендүүлүк күнүнө арналган майрамдык иш-чараларга катышууга чакырды. Бул сапар эки өлкөнүн стратегиялык өнөктөштүгүн мындан ары тереңдетүүгө кошумча күчтүү түрткү берет деген күтүүлөр бар.
Мамилелердеги жаңы баракча
Кыргызстандын президенти Садыр Жапаров жогорку даражалуу конокту тосуп алып жатып, өткөн жылдын декабрында Исламабадга жасаган мамлекеттик сапарынын алкагында өткөрүлгөн сүйлөшүүлөрдү эске салды.
Мамлекет башчысы ошол жолугушуулар кыргыз-пакистан мамилелеринде жаңы барак ачып, өз ара саясий ишенимди бекемдөөгө жана эки тараптуу кызматташтыкты активдештирүүгө бекем негиз түзгөнүн белгиледи.
Кылымдарды карыткан достук жана өз ара урмат-сый байланыштарына таянуу менен президент Кыргызстан Пакистанды Түштүк Азиядагы ишенимдүү жана артыкчылыктуу өнөктөш катары карай турганын ырастады.
"Бүгүнкү жолугушуу кызматташтыгыбызды жаңы мазмун менен толуктап, саясий диалогду бекемдөөгө, ошондой эле соода-экономикалык байланыштарды сапаттык жактан жаңы деңгээлге чыгарууга жакшы мүмкүнчүлүк түзөт деп ишенем", – деди Садыр Жапаров.
Өз кезегинде Асиф Али Зардари эки тараптуу кызматташтыкты мындан ары да кеңейтүүгө кызыкдар экенин билдирип, соода-экономикалык, инвестициялык жана гуманитардык тармактарда өз ара аракеттенүүнү өнүктүрүү үчүн олуттуу потенциал бар экенин белгиледи. Асиф Али Зардари Кыргызстан менен тыгыз кызматташууга даяр экенин билдирип, эки өлкөнүн мамилелери жалпы тарыхый жана маданий байланыштардын бекем пайдубалына негизделгенин айтты.
"Географиялык жакындык жана континенттеги жалпы мурас тарыхый жактан эки элди жакындаштырып келген, бүгүнкү күндө да өнөктөштүгүбүздү мындан ары бекемдөөгө жана тереңдетүүгө эч кандай тоскоолдук жок", – деди Пакистандын президенти.
Сүйлөшүүлөрдүн жыйынтыгында лидерлер үзгүлтүксүз саясий диалогду улантууга жана бардык деңгээлдерде байланыштарды активдештирүүгө өз ара даяр экенин ырасташты.
Белгилей кетсек, 2025-жылдын 3-декабрында президент Садыр Жапаров Пакистандын премьер-министри Шахбаз Шарифтин чакыруусу менен Пакистанга мамлекеттик сапар менен барган. Мамлекеттик сапардын алкагында 4-декабрда экономика, деңиз портторун пайдалануу, билим берүү, саламаттык сактоо, маданият, айыл чарба, туризм, энергетика, юстиция жана укуктук маселелер боюнча кызматташтыкты кеңейтүүгө багытталган кол коюлган документтерди алмашуу аземи өткөн.
Садыр Жапаров менен Шахбаз Шариф эки өлкөнүн кызыкчылыгы үчүн ар тараптуу кызматташтыкты бекемдөө боюнча биргелешкен билдирүүгө кол коюшкан. Мындан тышкары, бир катар эки тараптуу документтерге кол коюлган. Алардын арасында Кыргызстан менен Пакистандын ортосунда соттолгон адамдарды өткөрүп берүү жөнүндө макулдашуу да бар.
Ошондой эле Кыргызстандын министрлер кабинети менен Пакистандын өкмөтүнүн ортосунда маданият жаатындагы кызматташтык жөнүндө макулдашууга кол коюлуп, туризм жаатындагы кызматташтык жөнүндө өз ара түшүнүшүү тууралуу меморандум түзүлгөн.
Айыл чарба тармагында Кыргызстандын министрлер кабинети менен Пакистандын өкмөтүнүн ортосунда айыл чарба жаатындагы кызматташтык жөнүндө өз ара түшүнүшүү тууралуу меморандумга кол коюлган.
Соода жүгүртүүнү кеңейтүү максатында тараптар Кыргызстан менен Пакистандын ортосундагы эки тараптуу сооданы кеңейтүү боюнча өз ара түшүнүшүү тууралуу меморандумга кол коюшкан.
Ошондой эле транспорттук-логистикалык багытка өзгөчө көңүл бурулган. Бул тармакта Кыргызстандын Экономика жана коммерция министрлиги менен Пакистандын Деңиз иштери министрлигинин ортосунда аймактык байланыш үчүн Пакистандын портторун пайдалануу жаатындагы өз ара кызматташтык жөнүндө өз ара түшүнүшүү тууралуу меморандумга кол коюлган. Энергетика жаатында дагы кызматташтык жөнүндө өз ара түшүнүшүү тууралуу меморандум түзүлгөн.
Укуктук кызматташтык Кыргызстандын Юстиция министрлиги менен Пакистандын Укук жана юстиция министрлигинин ортосундагы укуктук кызматташтык жөнүндө өз ара түшүнүшүү тууралуу меморандум менен бекемделген.
Тоо-кен иштери жана геология илимдери жаатында Кыргызстандын Жаратылыш ресурстары, экология жана техникалык көзөмөл министрлиги менен Пакистан Исламдын Энергетика министрлигинин (мунай тармагы) ортосунда тоо-кен иштери жана геология илимдери жаатындагы кызматташтык жөнүндө өз ара түшүнүшүү тууралуу меморандумга кол коюлган.
Саламаттык сактоо тармагында тараптар Кыргызстандын Саламаттык сактоо министрлиги менен Пакистандын Улуттук саламаттык сактоо кызматтары, жөнгө салуу жана координация министрлигинин ортосунда хирургиялык аспаптар жаатындагы кызматташтык жөнүндө өз ара түшүнүшүү тууралуу меморандумга кол коюшкан.
Жаштар багыты Кыргызстандын Маданият, маалымат жана жаштар саясаты министрлиги менен Пакистандын премьер-министринин Жаштар программасынын ортосунда түзүлгөн өз ара түшүнүшүү тууралуу меморандум аркылуу камтылган.
Бажы органдарынын өз ара иштешүүсүн жөнөкөйлөтүүдөгү маанилүү кадамдардын бири Кыргызстандын Мамлекеттик бажы кызматы менен Пакистандын Бажы кызматынын ортосунда маалыматтарды электрондук алмашууну жолго коюу боюнча өз ара түшүнүшүү тууралуу меморандумдун түзүлүшү болду.
Мындан тышкары, Бишкек жана Исламабад шаарларынын ортосунда боордоштук мамилелер түзүлгөн.
Дипломатиялык билим берүү жаатында эки документке кол коюлду: Кыргызстандын Тышкы иштер министрлигинин Казы Дикамбаев атындагы Дипломатиялык академиясы менен Пакистандын Тышкы иштер министрлигинин Дипломатиялык кызмат академиясынын ортосундагы өз ара түшүнүшүү тууралуу меморандум, ошондой эле Кыргызстандынын ушул эле академиясы менен Пакистандын Заманбап тилдер боюнча улуттук университетинин ортосундагы өз ара түшүнүшүү тууралуу меморандум.
Ошентип, 2025-жылдын декабрында жетишилген макулдашуулар бүгүнкү күндө кыргыз-пакистан кызматташтыгы үчүн келечектүү деп каралып жаткан дээрлик бардык негизги тармактарды камтыды.
Ошол эле учурда саясий потенциалдын олуттуу экенине карабастан, эки өлкөнүн экономикалык байланыштары азырынча салыштырмалуу төмөн деңгээлде бойдон калууда.
Кыргызстан Пакистан менен кызматташуудан эмнеге ээ боло алат
Пакистан менен соода-экономикалык кызматташтыкты тереңдетүү Кыргызстанга Түштүк Азиянын ири рыногуна кеңири жол ачып, экспорттук багыттарды диверсификациялоого жана ата мекендик өндүрүүчүлөр үчүн жаңы мүмкүнчүлүктөрдү кеңейтүүгө шарт түзүшү мүмкүн.
Мында потенциалдуу пайда экспорттун көлөмүн көбөйтүү менен гана чектелбейт. Ошондой эле инвестиция тартуу, биргелешкен ишканаларды түзүү, тажрыйба жана технология алмашуу, өнөр жайды өнүктүрүү жана бизнес үчүн жаңы мүмкүнчүлүктөрдү түзүү маселелери да каралууда.
Экономика илимдеринин доктору Төлөнбек Абдыров "Кабар" агенттигине билдиргендей, Кыргызстан менен Пакистандын ортосундагы достук мамилелер илгертеден бери эле калыптанып келген, анткени эки өлкө ШКУга мүчө болуп саналат. Анын айтымында, эң негизгиси – акыркы мезгилде тыгыз байланыштардын калыптана башташы.
Анын айтымында, буга чейин да Кыргызстандын Пакистан менен соода жүгүртүүсүнүн көлөмү болжол менен 20-30 млн долларды түзүп келген.
Мындан тышкары, Кыргызстанга билим алуу үчүн келген пакистандык студенттер окуу акысын төлөп, турак жайды ижарага алып, соода-сатык иштерин жүргүзүү менен өлкөбүздө олуттуу каражат калтырышат.
"2025-жылдын декабрь айында президент Садыр Жапаров расмий сапар менен Пакистанга барып, анда 16 документке кол коюлган. Ошол эле учурда мамлекет башчысы Пакистандын президентин Кыргызстанга чакырган. 2026-жылдын июль айында Пакистандын президенти Кыргызстанга расмий сапар менен келди. Келечекте чоң ийгиликтерге алып келе турган документтерге кол коюлду. Эң негизгиси өз ара соода жүгүртүүнүн көлөмүн 2 млн долларга жеткирүү боюнча макулдашууга жетишилди", – деди эксперт.
Абдыров белгилегендей, Кыргызстан менен Пакистандын ортосундагы байланыштар кандай жыйынтыктарга жана кандай пайдага алып келери жөнүндөгү маселе абдан маанилүү.
"Менин оюмча, Кыргызстандын өкмөтү алдын ала комплекстүү чараларды көрүп жатат. Келечекте Кытай – Кыргызстан – Өзбекстан темир жолу ишке киргенде, биз көптөгөн өлкөлөр менен соода жүргүзө алабыз. Пакистан Кытай аркылуу бир катар портторго ээ, бул бизге Араб аймагына чыгуу үчүн жакшы мүмкүнчүлүк түзөт", – деп баса белгиледи эксперт.
Анын айтымында, мындай кызматташууга эки тарап тең кызыкдар.
"Мындан тышкары, Пакистандын товарларын Кытай жана темир жолу аркылуу Европага жана Перс булуңу аймагына жеткирүү үчүн да чоң мүмкүнчүлүктөр ачылат. Ошентип, бул эки тарап үчүн тең пайдалуу болот", – деп белгиледи ал.
Кыргызстан Пакистандан эмнелерди ала алат
Соода көлөмүн түздөн-түз көбөйтүүдөн тышкары, Пакистан Кыргызстан үчүн өлкөбүздө мындан ары өнүктүрүүгө мүмкүнчүлүк бар тармактарда тажрыйбага ээ өнөктөш катары кызыктуу болушу мүмкүн.
Бул жерде биринчи кезекте текстиль өнөр жайы, айыл чарба продукциясын кайра иштетүү, фармацевтика, хирургиялык аспаптарды өндүрүү, халал стандарттарын киргизүү, өнөр жай жана логистика тармактары жөнүндө сөз болуп жатат.
Текстиль жана жеңил өнөр жай
Текстиль жана тигүү өнөр жайы – Пакистандын негизги тармактарынын бири. Өлкө текстиль продукциясын экспорттоо боюнча дүйнөдө 8-орунда, пахта өндүрүү боюнча 5-орунда турат.
Текстиль өнөр жайы өлкөнүн жалпы экспортунун болжол менен 60 пайызын түзөт. Пакистанда жип жана кездемеден тартып даяр кийим-кече жана үй текстилине чейин продукция өндүрүүнүн дээрлик бардык баскычтары жолго коюлган. Кыргызстан үчүн бул тажрыйба өлкөдө тигүү тармагы жакшы өнүккөндүгүн эске алганда өзгөчө кызыгуу жаратат.
Эксперт Төлөнбек Абдыровдун пикиринде, бул багытта да кызматташтыкты кеңейтүүгө мүмкүнчүлүктөр бар.
"Ошондой эле айыл чарба продукцияларын, жашылча-жемиштерди жана текстиль продукцияларын сатууга мүмкүнчүлүк түзүлөт. Пакистанда өндүрүш жакшы өнүккөн, ал жерде унааларга чейин чыгарылат, оор жана жеңил өнөр жай тармактары өнүккөн", – деди ал.
Кыргызстан үчүн сапаттуу Пакистандын кездемелерин жана жиптерди импорттоо келечектүү багыттардын бири болушу мүмкүн. Бул жергиликтүү жеңил өнөр жайдын өнүгүшүн тездетүүгө өбөлгө түзө алат.
Кызматташтык мындан ары да өнүккөн учурда биргелешкен өндүрүштөрдү түзүүгө жана өндүрүштүк чынжырларды тереңдетүүгө мүмкүнчүлүк түзүлүшү мүмкүн.
Айыл чарба жана кайра иштетүү тармагы
Пакистандын дагы бир күчтүү тарабы – айыл чарба жана айыл чарба продукцияларын кайра иштетүү тармагы. Өлкө буудай, күрүч, анын ичинде басмати сортундагы күрүч, манго, кант камышы жана сүт өндүрүү боюнча дүйнөдөгү алдыңкы беш өлкөнүн катарына кирет.
Эт жана сүт багытындагы мал чарбачылыгы, ошондой эле мөмө-жемиш жана жашылча продукцияларын кайра иштетүү тармактары жакшы өнүккөн. Кыргызстан үчүн бул сооданы кеңейтүү жагынан да, тажрыйба алмашуу жагынан да пайдалуу болушу мүмкүн.
Ошондой эле келечектүү багыттардын бири – халал индустриясы. Пакистанда Жакынкы Чыгышта жана Түндүк Африкада таанылган халал продукциясын сертификациялоо системасы жакшы өнүккөн. Кыргызстан үчүн Пакистандын тажрыйбасы өзүнүн халал индустриясын өнүктүрүүдө жана эт-сүт продукцияларын араб өлкөлөрүнүн рынокторуна чыгарууда пайдалуу болушу мүмкүн.
Фармацевтика
Кыргызстан Пакистандын фармацевтика тармагына да өзгөчө көңүл бурушу мүмкүн. Пакистан Азия жана Африка өлкөлөрүнө дары-дармектерди көп экспорттогон, генерик препараттарды өндүрүү боюнча алдыңкы өлкөлөрдүн бири болуп саналат. Өлкөдө сапаттуу жана жеткиликтүү дары-дармектердин кеңири түрүн чыгарган 750дөн ашуун фармацевтикалык ишкана иштейт.
Төлөнбек Абдыровдун пикиринде, дал ушул фармацевтика тармагы Кыргызстан үчүн өзгөчө кызыгуу жаратышы мүмкүн.
"Учурда бизди эң көп фармацевтика тармагы кызыктырышы мүмкүн, анткени алар сапаттуу дары-дармектерди өндүрүшөт. Эгерде биргелешкен ишканаларды түзүп, чогуу иш алып барсак, абдан жакшы болмок", – деди эксперт.
Мындан тышкары, 2025-жылдын декабрында Кыргызстан менен Пакистан хирургиялык аспаптар жаатындагы кызматташтык жөнүндө өз ара түшүнүшүү тууралуу меморандумга кол коюшкан. Бул Кыргызстан үчүн пакистандык өндүрүүчүлөрдүн тажрыйбасын үйрөнүүгө, кооперацияны өнүктүрүүгө жана келечекте биргелешкен өндүрүштү түзүү мүмкүнчүлүктөрүн кароого шарт түзөт.
Оор өнөр жай жана өндүрүш
Пакистан оор машина куруу жана металлургия тармагында олуттуу потенциалга ээ. Өлкөдө тракторлор жана айыл чарба техникалары чыгарылат, унаалар чогултулуп, ошондой эле коргонуу өнөр жайы өнүккөн.
Мындан тышкары, логистика жана деңиз портторуна чыгуу да маанилүү багыт болуп саналат. Кыргыз-пакистан кызматташтыгынын эң маанилүү багыттарынын бири логистика болушу мүмкүн. Пакистан сууда жайгашкан Гвадар портун пайдалануу боюнча тажрыйбага ээ жана Кытай-Пакистан экономикалык коридоруна (CPEC) катышат. Кыргызстан үчүн өлкөнүн транспорттук мүмкүнчүлүктөрүн Пакистандын порттору менен байланыштыруу мүмкүнчүлүгү өзгөчө кызыгуу жаратат.
Келечекте Кытай – Кыргызстан – Өзбекстан темир жолу бул системанын маанилүү элементтеринин бири болуп калышы мүмкүн. Эгерде транспорттук долбоорлор зарыл деңгээлде өнүктүрүлсө, Борбордук жана Түштүк Азиянын ортосунда товарларды ташуу үчүн жаңы мүмкүнчүлүктөр пайда болот.
Төлөнбек Абдыров бул багытта келечектеги мүмкүнчүлүктөр эки тарап үчүн тең пайдалуу болушу мүмкүн экенин белгилейт.
"Келечекте Кытай – Кыргызстан – Өзбекстан темир жолу ишке киргенде, биз көптөгөн өлкөлөр менен соода жүргүзө алабыз. Пакистан Кытай аркылуу бир катар портторго ээ, алардын жардамы менен Араб аймагына чыгууга мыкты мүмкүнчүлүк түзүлөт", – деди эксперт.
Дагы бир стратегиялык багыт – энергетика. "CASA-1000" долбоору бир топ жылдан бери ишке ашырылып келет жана аны каржылоонун жалпы көлөмү болжол менен 1,2 миллиард долларды түзөт. Кыргызстан өз тарабынан пландалган иштерди аткарды. Ошол эле учурда өлкө жаңы энергетикалык долбоорлорду, анын ичинде Камбар-Ата-1 ГЭСин, ошондой эле күн жана шамал энергетикасы объектилерин куруу долбоорлорун ишке ашырууда.
Пакистанга экспорттоло турган электр энергиясы "CASA-1000" долбоорунун линиясы аркылуу Афганистан аркылуу жеткирилет. Эксперт Төлөнбек Абдыровдун пикиринде, энергетика тармагындагы кызматташтык келечектеги өнөктөштүктүн эң маанилүү багыттарынын бири болуп калышы мүмкүн.
"Ал жакта электр энергиясынын баасы абдан жогору, бул бизге чоң пайда алып келет. Эгерде бул долбоорлор ишке кирсе, болжолдорго жана пландарга ылайык, келечекте соода жүгүртүүнүн көлөмү 500 миллион долларга жетиши мүмкүн. Муну эки тараптын тең кызыкчылыгы бар багыт деп айтууга болот", – деп сөзүн жыйынтыктады ал.
Ошентип, энергетика кызматташтыктын өзүнчө бир тармагы катары гана эмес, Борбордук жана Түштүк Азиянын ортосундагы кеңири интеграциянын бир бөлүгү катары каралууда.
Билим берүү эки өлкөнү буга чейин эле байланыштырып келет
Өз ара аракеттенүүнүн кыйла маанилүү багыттарынын бири болуп билим берүү тармагы саналат. Кыргызстанда 12 миңден ашуун пакистандык студент билим алат. Бул буга чейин калыптанган гуманитардык байланыш болуп саналат жана ошол эле учурда экономикалык мааниге да ээ: студенттер окуу акысын төлөшөт, турак жайды ижарага алышат, кызмат көрсөтүүлөрдөн пайдаланышат жана соода-сатык жүргүзүшөт. Келечекте билим берүү жаатындагы кызматташтыкты биргелешкен программаларды, илимий байланыштарды жана жаңы академиялык демилгелерди ишке ашыруу аркылуу кеңейтүүгө болот.
Бүгүнкү күндө Кыргызстан менен Пакистандын ортосунда олуттуу келишимдик база калыптанды. 2025-жылдын декабрында тараптар соода, энергетика, туризм, айыл чарба, портторду пайдалануу, маданият, билим берүү, саламаттык сактоо, юстиция жана башка багыттар боюнча документтерге кол коюшкан. 2026-жылдын июль айында эки өлкөнүн президенттери Чолпон-Ата шаарында бул диалогду улантып, жаңы Биргелешкен билдирүү менен бекемдешти.
Бирок эми негизги маселе – бул макулдашуулар канчалык тез арада иш жүзүнө аша тургандыгында. Азырынча соода жүгүртүүнүн көлөмү салыштырмалуу төмөн бойдон калууда – 2025-жылдын жыйынтыгы боюнча 16,1 млн долларды түзгөн, ал эми Пакистандын Кыргызстандын тышкы соодасындагы үлүшү болжол менен 0,1 пайызды түзөт. Ошол эле учурда кызматташтыктын потенциалы азыркы көрсөткүчтөргө караганда кыйла кеңири.
Тарыхый байланыштардан конкреттүү долбоорлорго карай
Асиф Али Зардаринин Кыргызстанга 20 жылдан ашуун убакыттан кийин жасаган сапары эки тараптуу мамилелердеги маанилүү окуя болду. Бирок анын мааниси тарыхый факт менен гана чектелбейт. Андан да маанилүүсү – бүгүнкү күндө эки өлкөнүн ортосундагы мамилелер жаңы динамикага жана конкреттүү мазмунга ээ болууда.
Тышкы иштер министрлиги "Кабар" агенттигине билдиргендей, Пакистан – Түштүк Азиядагы Кытай, Индия, Иран жана Афганистан менен чектешкен, Араб деңизине чыгуу мүмкүнчүлүгү бар ири мамлекет. Калкты акыркы расмий каттоонун маалыматтарына ылайык, өлкөнүн калкынын саны 241,5 млн адамды түзөт.
Кыргызстан менен Пакистандын ортосунда дипломатиялык мамилелер 1992-жылдын 10-майында түзүлгөн.
"Бүгүнкү күндө кыргыз-пакистан мамилелери өз тарыхындагы эң активдүү жана мазмундуу мезгилдердин бирин баштан кечирүүдө. Кыска убакыттын ичинде жогорку деңгээлдеги байланыштардын ырааттуу сериясы болуп өттү. Президент Садыр Жапаровдун 2025-жылдын 3-4-декабрында Пакистанга жасаган мамлекеттик сапары эки тараптуу кызматташтыкка жаңы дем берди. Анын логикалык уландысы катары Пакистандын президенти Асиф Али Зардаринин 2026-жылдын 6-9-июлунда Кыргызстанга жасаган жооп иретиндеги расмий сапары болду", – деп жыйынтыкташты ведомстводон.
