Бишкек, 03.11.25. /Кабар/. Кыргызстандын Экономика жана коммерция министрлигинин Кытайдагы өкүлчүлүгү 25-29-октябрда Янлин шаарында өткөн XXXII Кытай Янлин жогорку технологиялуу айыл чарба жарманкесине катышты.
Ведомстводон маалымдашкандай, көргөзмөдө Кыргызстандын стенди уюштурулуп, анда бал, кургатылган жемиштер, жаңгактар, ар кандай таттуулар жана башка продукциялар сыяктуу ата мекендик айыл чарба азыктары көрсөтүлдү.
Иш-чаранын алкагында Кыргызстандын Соода өкүлчүлүгүнүн өкүлдөрү ШКУга мүчө мамлекеттердин айыл чарба продукцияларын илгерилетүү, жеткирүү жана сатып алуу маселелерине арналган жыйынына да катышты.
Жолугушуунун жүрүшүндө Кыргызстандын экспорттук мүмкүнчүлүгү тааныштырылып, агрардык тармактагы кызматташтыкты кеңейтүү келечеги талкууланды.
