Бишкек, 16.07.26. /Кабар/. Инвестициялар боюнча улуттук агенттиктин башчысы Равшанбек Сабиров Корея Республикасынын Кыргызстандагы элчиси Ким Квангдже менен жолугушту.
Агенттиктен билдиришкендей, жолугушууда тараптар өлкөгө түштүк кореялык капиталды тартуу, инвесторлордун укуктарын коргоо жана биргелешкен долбоорлорду ишке ашыруу мүмкүнчүлүктөрүн талкуулашты.
Равшанбек Сабиров корей тарапка инвестициялык климатты жакшыртуу багытында жасалып жаткан иштер, өзгөчө инвесторлорду коштоп жүрүүчү "бирдиктүү терезе" принциби тууралуу кеңири маалымат берди.
"Кыргызстан түштүк кореялык инвесторлор үчүн ачык. Биз заманбап технологияларды тартууга, жаңы өндүрүштөрдү түзүүгө жана эки өлкө ортосундагы узак мөөнөттүү өнөктөштүктү чыңдоого өбөлгө түзгөн долбоорлорду ишке ашырууга кызыкдарбыз", - деди Сабиров.
Өз кезегинде элчи Ким Квангдже Түштүк Корея тарап Кыргызстан менен экономикалык өнөктөштүктү мындан ары да өнүктүрүүгө жана эки өлкөнүн бизнес-коомчулугу ортосунда жаңы кызматташтык көпүрөлөрүн курууга даяр экенин баса белгиледи.
Жолугушуунун жыйынтыгында тараптар биргелешкен демилгелерди конкреттүү ишке ашыруу боюнча конструктивдүү диалогду улантууну макулдашышты.
