Ташкент, 28.09.25. /Кабар/. 2025-жылдын 25–26-сентябрында Манас шаарында Кыргызстан менен Өзбекстандын ведомстволор аралык координациялык жумушчу тобунун жана чек арадагы ички иштер органдарынын жетекчилеринин кезектеги жыйыны болуп өттү. Бул тууралуу Өзбекстандын Ички иштер министрлигинин басма сөз кызматы билдирди.
Жыйынга эки өлкөнүн делегациялары, министрликтердин орун басар жетекчилери, борбордук кызматтардын өкүлдөрү жана чек ара облустарынын ички иштер башкармалыктарынын жетекчилери катышты.
Иш-чарада экстремизм жана терроризмге каршы күрөш, мыйзамсыз миграциянын алдын алуу, баңгизаттардын мыйзамсыз жүгүртүлүшүнө бөгөт коюу жана киберкылмыштуулукка каршы биргелешкен аракеттер талкууланды.
Тараптар кызматташтыкты мындан ары да чыңдоого, тажрыйба алмашууга, өз ара делегациялык сапарларды уюштурууга жана маалымат алмашууну кеңейтүүгө макулдашышты.
Эксперттердин баамында, бул жыйындын жыйынтыктары кыргыз-өзбек укук коргоо органдарынын кызматташтыгын жаңы деңгээлге чыгарып, чек ара аймактарында коопсуздукту жана туруктуулукту камсыз кылууга багытталган маанилүү кадам болду.
