Бишкек, 06.07.26 /Кабар/. Кыргызстан менен Түркия коопсуздук жана киберкылмыштуулукка каршы күрөштө кызматташууну күчөтөт. Бул тууралуу ИИМден билдиришти.
Маалыматка ылайык, маселе күн мурун Анкара шаарында Кыргызстандын Түркиядагы элчиси Руслан Казакбаев менен ИИМдин Түркиядагы өкүлү Манас Аманбаевдин Түркиянын ИИМинин Коопсуздук башкы башкармалыгынын жаңы дайындалган башчысы Али Фидан менен жолугушуусунда талкууланды.
Анда тараптар эки мамлекеттин коопсуздугун камсыздоо, жарандардын укуктарын коргоо жана укук коргоо органдарынын ортосундагы өз ара аракеттенүүнү өнүктүрүү маселелерин талкуулашты.
Сүйлөшүүдө кадрларды даярдоого өзгөчө көңүл бурулду. КР ИИМдин кызматкерлерин Түркияда окутууну улантуу, ошондой эле киберкылмыштуулукка, экстремизмге, баңгизаттарды мыйзамсыз жүгүртүүгө каршы күрөшүү жана коомдук тартипти камсыз кылуу боюнча биргелешкен билим берүү программаларын кеңейтүү макулдашылды.
