Бишкек, 09.04.26. /Кабар/. Казань шаарында өткөн “Энергопром” эл аралык форумунун алкагында Энергетика министрлиги менен Татарстандын ири энергетикалык компанияларынын ортосунда эки тараптуу кызматташууну тереңдетүү боюнча сүйлөшүүлөр өттү. Бул тууралуу аталган министрликтен билдиришти.
Ведомствонун маалыматына ылайык, анда делегация мүчөлөрү Татарстандын алдыңкы өндүрүш ишканаларынын ишмердүүлүгү жана технологиялык мүмкүнчүлүктөрү менен таанышты.
Ошондой эле бир катар стратегиялык ишканалардын жетекчилери менен кызматташуу талкууланды.
"Тараптар даяр продукцияны жеткирүү менен гана чектелбестен, Кыргызстандын аймагында өндүрүштү жайгаштыруу маселесин карашты. Атап айтканда, кабель продукцияларын, бөлүштүрүүчү калкан жана эсептегичтерди чогултуу, монтаждоо иштерин биргелешип аткаруу, ошондой эле келечекте биргелешкен ишканаларды түзүү аркылуу энергетикалык инфраструктураны өнүктүрүү пландалууда",-деп белгиленет маалыматта.
