Бишкек, 09.07.25. /Кабар/. Бүгүн башкы прокурор Максат Асаналиев менен Россиянын Адам укуктары боюнча ыйгарым укуктуу өкүлү Татьяна Москалькованын жолугушуусу өттү.
Прокуратурадан билдиришкендей, жолугушууга Кыргызстандын акыйкатчысы Жамиля Жаманбаева да катышты.
Тараптар талкуу учурунда эки мамлекеттин көзөмөлдөө жана адам укуктарын коргоо институттарынын ортосундагы кызматташтыкты мындан ары тереңдетүүнүн маанилүүлүгүн белгилешти.
Айрыкча, жарандардын кайрылууларына ыкчам чара көрүү, камакта кармоо шарттарына мониторинг жүргүзүү, ошондой эле мигранттарга укуктук жана гуманитардык жардам көрсөтүү кепилдиктерин күчөтүү маселелерине көңүл бурушту. Бул багытта адам укуктарын коргоо механизмдеринин алкагында кызматташуунун өзгөчө мааниси белгиленди.
Жолугушуунун жыйынтыгында тараптар туруктуу диалогду бекемдөөнүн, биргелешкен консультациялардын жана эки мамлекеттин жарандарынын укуктук корголушун камсыз кылуу боюнча аракеттерди координациялоонун зарылдыгын белгилешти.
