Бишкек, 21.07.25. /Кабар/. Бүгүн Бишкекте президент Садыр Жапаров менен Монголиянын президенти Ухнаагийн Хурэлсухтун расмий жолугушуу аземинин алкагында Кыргыз улуттук "Кабар" маалымат агенттиги менен Монголиянын "Монцамэ" улуттук агенттиги ортосунда өз ара түшүнүшүү жөнүндө меморандумга кол коюлду.
Документке ылайык, тараптар эки өлкөнүн ортосунда кызматташтыкты өнүктүрүү жана үзгүлтүксүз маалымат алмашууну жолго коюуну көздөйт.
Анын ичинде, тараптар социалдык-экономикалык абал, бизнес, туризм, маданият, искусство жана тарых жаатындагы жаңылыктарды акысыз негизде бөлүшүшөт.
Меморандум ошондой эле журналисттердин өз ара иш сапарларын жана алмашуу программаларын уюштурууга шарт түзөт.
Меморандумга Кыргыз улуттук «Кабар» агенттигинин директору Медербек Шерметалиев жана «Монцамэ» агенттигинин башкы директору Энх-Орших Хурлээ кол коюшту.
