Бишкек, 17.05.25. /Кабар/. "Кыргызстан аэропорттору" ААКтын жетекчиси Манасбек Самидинов Кытайдын Жарандык авиация администрациясынын (CAAC) төрагасынын жардамчысы Чжу Яочун менен жолукту. Бул тууралуу ал өзү социалдык тармактагы баракчасына бөлүштү.
Жолугушууда кытай тарап КЭРдин жарандык авиациясынын учурдагы абалы жана келечеги боюнча кеңири баяндама жасады.
Чжу Яочундун айтымында, Кытай экономикасынын туруктуу жана жогорку деңгээлде өсүшү транспорт тармагын өнүктүрүүгө бекем негиз түзүүдө: 2024-жылы өлкөнүн ИДПсы 5 пайызга өстү, ал эми аба жүргүнчүлөрүнүн саны рекорддук көрсөткүч — 730 млн адамга жеткен.
Чжу Яочун ошондой эле Кытай аба транспорту ассоциациясынын (CATA) активдүү ишмердүүлүгү тууралуу айтып берди. Бул ассоциация 1000ден ашуун авиациялык уюмдарды бириктирет: авиакомпаниялар, аэропорттор, өндүрүш жана логистика компаниялары, учкучсуз учуучу аппараттар менен иштеген уюмдар жана башкалар.
Делегациянын сапарынын негизги максаттары төмөнкүлөр болду:
- аба ташуулар, кадрларды даярдоо жана авиациялык машина куруу жаатындагы кызматташууну өнүктүрүү;
- авиациялык коопсуздук багытындагы өз ара аракеттенүү механизмдерин талкуулоо;
- Кытайда чыгарылган учактарды, айрыкча C919 жана C929 үлгүлөрүн илгерилетүү;
- Кыргызстанда авиациялык материалдар боюнча регионалдык борбор түзүү жана Урумчи/Кашгар – Бишкек/Ош багыттарында жүк ташуучу туруктуу авиакаттамдарды ишке киргизүү боюнча демилге;
- Кыргызстандагы аэропортторду модернизациялоо боюнча инфраструктуралык долбоорлорду биргелешип ишке ашыруу сунушу, анын ичинде Xinjiang Airport Group компаниясынын катышуусу менен;
- гуманитардык жана маданий кызматташууну өнүктүрүү, анын ичинде кытай авиациялык технологиялары боюнча Ачык эшиктер күндөрүн өткөрүү;
- кыргыз тарапты 5-6-июнда Пекин шаарында өтө турган Эл аралык авиациялык коопсуздук форумуна катышууга чакыруу.
Самидинов белгилегендей, Кыргызстандын Кытай менен авиация тармагындагы кызматташтыкка болгон кызыгуусу өсүүдө. "Кыргызстан аэропорттору" ААК эки тараптуу байланыштарды тереңдетүүгө, авиациялык инфратүзүмдү санариптештирүүгө, туруктуу өнүгүүгө жана адистерди даярдоого даяр.
