Бишкек, 20.12.25. /Кабар/. Күн мурун Үрүмчү шаарында кыргыз жана кытай компанияларынын ортосунда курулуш материалдары жаатында түз байланыштарды түзүүгө багытталган иш-чара өттү.
Экономика жана коммерция министрлигинен билдиришкендей, иш-чараны Кыргызстандын Кытайдагы соода өкүлчүлүгү Курулуш, архитектура жана турак жай-коммуналдык чарба министрлиги менен биргеликте уюштурду.
Иш-чарага түз жеткирүү каналдарын түзүүгө жана колдонулган материалдардын сапатын жогорулатууга кызыкдар болгон 30дан ашык ири кыргыз курулуш жана өнүктүрүү компанияларынын өкүлдөрү катышты. Кытай тараптан иш-чарага Үрүмчү шаарынан 70тен ашык курулуш материалдарын жана комплекстөөчү тетиктерди өндүрүүчүлөр катышты.
Иш-чаранын максаты түз диалог үчүн эффективдүү аянтча түзүү, өндүрүштүк мүмкүнчүлүктөрдү көрсөтүү, техникалык мүнөздөмөлөрдү, стандарттарды жана логистикалык схемаларды талкуулоо болду.
Эки өлкөнүн бизнес-коомчулуктарынын ортосунда түз байланыштарды түзүү Кыргызстандын курулуш тармагынын атаандаштыкка жөндөмдүүлүгүн жогорулатууга жана технологиялык жаңыланууга өбөлгө түзүүгө багытталган.
