Бишкек, 19.08.25./Кабар/. Кыргызстан менен Кытай коомдук тартипти камсыздоо багытында кызматташууну күчөтүүдө. Бул тууралуу Ички иштер министрлигинен билдиришти.
Маалыматка ылайык, 18-21-август күндөрү Кыргызстанга Кытайдын Хэнань провинциясынын Коомдук коопсуздук департаментинин делегациясы расмий иш сапары менен келди. Делегацияны департаменттин орун басары Го Чжишэн жетектеп келди.
Иш сапардын жүрүшүндө делегация Чүй облусунун ички иштер башкы башкармалыгынын жетекчилиги менен жолугушту.
Жолугушууда эки тараптын укук коргоо органдарынын ортосундагы кызматташууну чыңдоо жана тажрыйба алмашуу маселелери талкууланды. Коомдук тартипти камсыз кылуу, укук бузуулардын алдын алуу жана кызматкерлердин кесиптик даярдыгын жогорулатуу боюнча өз ара аракеттенүүнү кеңейтүү мүмкүнчүлүктөрүнө өзгөчө көңүл бурулду.
Иш-чаранын жыйынтыгында тараптар мындан ары да өз ара урматтоо жана ишеним негизинде натыйжалуу байланышты улантууга жана өнөктөштүк мамилени бекемдөөгө даяр экендиктерин билдиришти.
