Бишкек, 29.07.26. /Кабар/. Кыргызстандын Мамлекеттик китеп палатасында Кытайдын "Синьхуа" жана "Феникс-Чуиши" басмаларынын өкүлдөрү менен жолугушуу өттү.
Маданият министрлигинен билдиришкендей, жолугушууда тараптар китеп басып чыгаруу, китеп маданиятын өнүктүрүү жана гуманитардык кызматташтыкты кеңейтүү маселелерин талкуулады.
Ошондой эле тараптар көркөм, илимий-популярдуу жана балдар адабиятын өз ара которуп басып чыгаруу, биргелешкен басма долбоорлорун ишке ашыруу, китеп продукциялары менен алмашуу жана кесиптик иш-чараларды өткөрүү боюнча кызматташууну кеңейтүүгө кызыкдар экендиктерин билдиришти.
Жолугушуунун жыйынтыгында кыргыз-кытай китеп тармагындагы өнөктөштүктү бекемдөө жана гуманитардык байланыштарды мындан ары өнүктүрүү боюнча кызматташтыкты улантуу тууралуу макулдашылды.
