Бишкек, 24.06.25. /Кабар/. Кыргызстан менен Түштүк Корея курулуш жана энергетика тармагында биргелешкен долбоорлорду караштырууда. Бул тууралуу Соода-өнөр жай палатасынан билдиришти.
Кыргызстандын Соода-өнөр жай палатасында Түштүк Кореянын ишкерлер делегациясы менен жолугушуу болуп өттү. Делегацияга ишкерлерди колдоо бөлүмүнүн директору жана Кыргыз-корей кызматташтык ассоциациясынын төрагасы Пак Чон Дэ жетекчилик кылды.
Курулуш материалдарын (турак жай, өнөр жай объектилери жана энергетикалык станциялар үчүн) чыгаруучу кореялык компаниялар Кыргызстандын рыногуна чыгууга кызыкдар экенин билдиришти. Делегация өкүлдөрү өлкөдө жүрүп жаткан курулуш тармагынын өсүшүн белгилешип, бул багытта өз ара пайдалуу кызматташуу үчүн кеңири мүмкүнчүлүктөр бар экенин белгилешти.
Кыргыз тараптан делегацияны ТППнын вице-президенттери Толкунай Таалайбекова жана Мамасадык Бакиров, Энергетика комитетинин төрайымы Күндүз Кырбашева жана Палатанын курулуш комитетинин өкүлү кабыл алды.
Жолугушууда тараптар кыргыз-корей ишкердик байланышын кеңейтүү, тажрыйба алмашуу жана курулуш менен энергетика тармагында биргелешкен долбоорлорду ишке ашыруу мүмкүнчүлүктөрүн талкуулашты.
