Бишкек, 18.02.26. /Кабар/. Күн мурун маданият, маалымат жана жаштар саясаты министри Мирбек Мамбеталиев Кореянын Кыргызстандагы элчиси Ким Кван Джэ менен жолукту.
Ведомстводон маалымдашкандай, жолугушуунун жүрүшүндө тараптар маданият жана жаштар саясаты чөйрөсүндө кыргыз-корея кызматташтыгын өнүктүрүү маселелерин талкуулашып, биргелешкен маданий жана гуманитардык долбоорлорду ишке ашыруунун келечегин караштырды.
Ошондой эле музей ишин өнүктүрүү, маданий мурастарды сактоо, биргелешкен көргөзмөлөрдү уюштуруу жана санариптик долбоорлорду ишке ашыруу маселелери талкууланды.
Министр Мирбек Мамбеталиев корея тарапты быйыл өтө турган Дүйнөлүк көчмөндөр оюндарына жана Ысык-Көл форумунун 40 жылдыгына катышууга чакырып, бул эки өлкөнүн маданий байланышын чыңдай турганын белгиледи.
Жолугушуунун жыйынтыгында тараптар кыргыз-корея маданий-гуманитардык кызматташтыгын мындан ары да бекемдөөгө жана кеңейтүүгө өз ара кызыкдар экенин ырасташты. Ошондой эле биргелешкен долбоорлорду ишке ашыруу, маданий алмашууну кеңейтүү жана жаштардын катышуусун арттыруу боюнча тыгыз кызматташууга макулдашты.
