Бишкек, 13.07.26. /Кабар/. Инвестициялар боюнча улуттук агенттиктин башчысынын орун басары Мээримбек Койчуманов Италиянын Тышкы соода агенттигинин (ITA) президенти Маттео Зоппас жана Италиянын айыл чарба техникаларын өндүрүүчүлөр федерациясынын (FederUnacoma) президенти Мариятереза Маскио жетектеген делегация менен жолукту. Бул тууралуу аталган агенттиктен билдиришти.
Маалыматка ылайык, иш-чарага ITA, FederUnacoma`нын, Италиянын Казакстандагы элчилигинин жана Кыргызстандагы Ардактуу консулдугунун өкүлдөрү да катышты.
Тараптар Кыргызстандын инвестициялык потенциалын, мамлекеттик инвестициялык саясаттын артыкчылыктуу багыттарын жана өз ара кызматташуунун келечегин талкуулашты. Өзгөчө айыл чарба техникаларын өндүрүү, айыл чарба продукциясын кайра иштетүү, курулуш материалдарын жана эмерек өндүрүү, медицина, стоматология жана HoReCa тармактарына көңүл бурулду.
Мындан тышкары, италиялык өндүрүштөрдү Кыргызстандын эркин экономикалык аймактарында жайгаштыруу, ошондой эле Ысык-Көл облусунун жана "Тамчы" атайын финансылык-инвестициялык аймагынын мүмкүнчүлүктөрү тааныштырылды.
Жыйынтыгында тараптар инвестициялык байланыштарды кеңейтүүгө, биргелешкен демилгелерди илгерилетүүгө жана италиялык бизнес өкүлдөрүнүн катышуусундагы иш-чараларды уюштуруу боюнча кызматташууну улантууну макулдашышты.
