Бишкек, 22.10.26. /Кабар/. Кыргызстан менен Иран инновация жана технология жаатында кызматташат. Маселе экономика жана коммерция министринин орун басары Беназир Нурланованын Ирандын вице-президенти Эсфандияр Эхтияри менен жолугушуусунда талкууланды.
Ведомстводон маалымдашкандай, жолугушуу Креативдүү экономика боюнча 5-дүйнөлүк конференциянын алкагында өттү.
Тараптар соода-экономикалык кызматташтыкты кеңейтүү, санариптик технологияларды жана креативдүү индустрияларды өнүктүрүү маселелерин талкуулашты. Ошондой эле технологиялык парктар, илимий мекемелер жана ишкер чөйрөлөр ортосунда байланыш түзүү, стартаптарды колдоо жана биргелешкен инновациялык долбоорлорду ишке ашыруу мүмкүнчүлүктөрүн карашты.
Жолугушуунун жыйынтыгында тараптар илим, технология жана экономика тармактарында практикалык кызматташтыкты өнүктүрүүгө макулдашты.
