Бишкек, 27.11.25. /Кабар/. Күн мурун Бишкекте коргоо министри Руслан Мукамбетов Беларустун коргоо министри Виктор Хренин менен жолукту. Бул тууралуу министрликтен маалымдашты.
Жолугушуунун жүрүшүндө Кыргызстан менен Беларустун коргоо ведомстволорунун ортосундагы эки тараптуу кызматташуунун эң актуалдуу маселелери талкууланды.
"Кыргызстан менен Беларустун ортосунда өз ара урматтоого жана өз ара пайдалуу кызматташууга негизделген салттуу достук мамилелер бар. Тарыхый жана саясий контекстте биздин өлкөлөр ортосунда эч кандай карама-каршылыктар жана чечилбеген маселелер жок. Эки өлкөнүн ортосундагы мамилелерди кеңейтүү жана бекемдөө үчүн чоң потенциал бар", — деди Руслан Мукамбетов.
Соңунда тараптар Кыргызстан менен Беларустун Коргоо министрликтеринин ортосундагы 2026-жылга карата эки тараптуу кызматташуу планына кол коюшту.
Белгилей кетсек, тараптардын жолугушуусу Жамааттык коопсуздук келишим уюмуна мүчө мамлекеттердин Коргоо министрлеринин кеңешинин алкагында өттү.
