Бишкек, 20.08.26. /Кабар/. Кыргызстан менен Азербайжан сот адилеттигин санариптештирүү жана сот органдарынын ортосундагы практикалык кызматташтыкты кеңейтүү боюнча макулдашты. Бул тууралуу Кыргызстандын Жогорку сотунун төрагасынын орун басары Нурлан Мусаев баштаган делегациянын Азербайжандын Жогорку сотунун төрагасы Инам Имдад оглу Керимов менен жолугушуусунда айтылды.
Жогорку соттон билдиришкендей, жолугушууда тараптар электрондук документ жүгүртүү, сот иштерин каттоо жана бөлүштүрүү, сот материалдарына электрондук жеткиликтүүлүк, видеоконференцбайланыш жана маалыматтык коопсуздук маселелерин талкуулашты.
Ошондой эле биргелешкен семинарларды, эксперттик жолугушууларды жана адистердин тажрыйба алмашуу сапарларын уюштуруу, сот тутумун санариптештирүү боюнча биргелешкен долбоорлорду ишке ашыруу мүмкүнчүлүгү каралды.
Кыргыз тарап Азербайжандын электрондук сот адилеттиги жаатындагы тажрыйбасын үйрөнүүгө кызыкдар экенин билдирди.
