Бишкек, 22.06.26. /Кабар/. Жарандык авиация мамлекеттик агенттигинин директору Данияр Бостонов АКШнын Кыргызстандагы элчиси Лесли Вигери менен жолугушту. Бул тууралуу аталган агенттиктен билдиришти.
Маалыматка ылайык, анда тараптар өнөктөштүк мамилелерди чыңдоого жана өз ара кызыкчылык жараткан маселелер боюнча кызматташууну кеңейтүүгө болгон өз ара кызыкдарлыгын ырасташты.
Сүйлөшүүлөрдүн жүрүшүндө Кыргызстан менен АКШнын ортосундагы “Ачык асман” жөнүндө макулдашуунун долбоорун иштеп чыгуу маселесине өзгөчө көңүл бурулду. Тараптар эки өлкөнүн ортосундагы аба каттамдарын өнүктүрүүнүн келечегин, ошондой эле авиация тармагындагы эки тараптуу кызматташтыкты тереңдетүүгө багытталган мындан аркы кадамдарды талкуулашты.
Муну менен катар, Boeing компаниясы менен өз ара аракеттенүү маселелери жана Кыргызстандын жарандык авиациясын өнүктүрүү жаатындагы кызматташтыктын келечеги каралды. Бул багытта тараптар “Transportation Security Administration” (TSA) тарабынан жүргүзүлүүчү аудитке даярдык көрүү маселелерин, ошондой эле жүк ташуучу авиакомпаниялардын каттамдарын уюштуруу мүмкүнчүлүктөрүн иштеп чыгууну талкуулашты.
