Бишкек, 02.07.25. /Кабар/. 30-июнда Марракеш шаарында Ислам дүйнөсүнүн кызматташтык уюмунун жаштар форуму (ICYF) башталды. Бул тууралуу Маданият, маалымат жана жаштар саясаты министрлигинен билдиришти.
Форумдун негизги темасы — “Коронавирус пандемиясынан кийинки жаштар: артыкчылыктар жана үмүттөр”. Анда жаштар саясатынын келечеги, туруктуулук, иш менен камсыздоо, санариптик сабаттуулук жана коомдук биримдик талкууланган.
Кыргызстандын атынан иш-чарага Маданият, маалымат жана жаштар саясаты министринин орун басары Марат Тагаев катышты. Ал ал өз сөзүндө Кыргызстандын эл аралык форумдарга катышуусу жаштар саясаты боюнча тажрыйба алмашууга, мыкты практикаларды өздөштүрүүгө жана жаңы өнөктөштүктөрдү түзүүгө шарт түзөрүн белгилеп өттү.
Форум уланууда. Анын алкагында панелдик сессиялар, стратегиялык жолугушуулар, маданий иш-чаралар жана жаштар инфраструктурасына таанышуу сапарлары өтүүдө.
