Бишкек, 05.03.25. /Кабар/. Германияда 2025-жылдагы эң маанилүү дүйнөлүк туристтик көргөзмөлөрдүн бири ITB Berlin ачылды.
Туризмди өнүктүрүүнү колдоо фондунан билдиришкендей, эң ири туристтик көргөзмө ITB Berlin 2025тин ичинде Кыргыз Республикасынын улуттук стенди ачылып, 12 мекендеш туризм компаниялары өлкөбүздүн туристтик мүмкүнчүлүктөрүн көрсөтүп, дүйнө жүзүн биздин уникалдуу мүмкүнчүлүктөрүбүз менен таанышууга чакырууда.
Белгиленгендей, көргөзмөдө биздин стендди Германиядагы элчи Өмүрбек Текебаев жана Туризмди өнүктүрүүнү колдоо фондунун вице-президенти Асылбек Алиев ачты.
Белгилей кетсек, фонд чет өлкөлүк туристтерди тартуу жана алардын ыңгайлуу шарттарда болушу үчүн тынымсыз иш алып барууда. Бул жылы ITB Berlin көргөзмөсүндө туризм тармагында жасалма интеллект жана жаңы технологияларга чоң басым жасалууда.
ITB Berlin 2025 көргөзмөсү 6-мартка чейин уланат.
