Бишкек, 27.02.26. /Кабар/. Камбар-Ата-1 ГЭСинин курулушу Кыргызстандын тарыхындагы эң ири энергетикалык долбоор болуп калат. Бул тууралуу президент Садыр Жапаров республикалык кеңешмеде билдирди.
"Дагы бир тарыхый долбоорубуз — кубаттуулугу 1 860 мегаваттты түзгөн Камбар-Ата-1 ГЭСинин курулушу. Өлкө тарыхындагы эң ири энергетикалык долбоор боло турган бул гидроэлектрстанция ишке киргенден кийин Кыргызстан өзүнүн ички керектөөлөрүн толук камсыздап эле койбостон, электр энергиясын экспорттоочу мамлекетке айланат жана бүтүндөй чөлкөмдүн энергетикалык туруктуулугуна салым кошот", — деди президент.
Мамлекет башчысы бул долбоордун ишке ашырылышы өлкөнүн энергетикалык коопсуздугун чыңдап, экономикалык өсүш менен аймактын туруктуу өнүгүүсү үчүн маанилүү кадам болорун баса белгиледи.
Эскерте кетсек, "Ынтымак Ордодо" президент Садыр Жапаровдун катышуусунда 2025-жылдын жыйынтыгын чыгаруу боюнча республикалык кеңешме өттү.
