Бишкек, 16.12.25. /Кабар/. Күн мурун Кыргызстандын демилгеси менен Нью-Йорк шаарында БУУнун Тынчтыкты куруу комиссиясынын жыйыны өттү.
Тышкы иштер министрлигинен билдиришкендей, жыйын Германиянын төрагалыгы астында өтүп, жыйында Кыргызстан, Тажикстан жана Өзбекстандын чек ара маселелерин эл аралык укуктун алкагында, тынчтык жолу менен жөнгө салуудагы жетишкендиктери жогору бааланды.
Тышкы иштер министринин биринчи орун басары Асеин Исаев белгилегендей, Борбор Азия аймагы эң татаал жана тарыхый маселелерди дагы диалог, өз ара ишеним жана саясий эрк аркылуу ийгиликтүү чечиле аларын далилдеди.
Комиссиянын жыйынына БУУга мүчө 80ден ашуун мүчө мамлекеттин өкүлдөрү катышып, жетишилген макулдашууларды мамлекет башчыларынын саясий эркинин жана дипломатиялык жетилгендиктин үлгүсү катары белгилешти.
Сапардын алкагында Асеин Исаев ошондой эле БУУнун Коопсуздук кеңешинин "Тынчтык үчүн лидерлик" темасындагы жыйынына катышып, Кыргызстан тынчтыкты, туруктуулукту жана диалогду илгерилетүүгө бекем берилгенин ырастады.
