Ташкент, 15.08.25. /Кабар/. Кыргызстандын президентине караштуу Улуттук стратегиялык изилдөөлөр институтунун директорунун орун басары Шумкарбек Адилбек уулу VIII Борбор Азия эксперттик форумунда сүйлөгөн сөзүндө аймактын тынчтыкта жана туруктуу өнүгүшү үчүн мамлекеттердин ынтымагы менен бөлүнгүс коопсуздугу эң башкы шарт экенин белгиледи, деп билдирет өз кабарчыбыз.
Ал 2025-жылдын 13-мартында Тажикстан менен кол коюлган чек ара тууралуу келишимди жана «тактык нейтралитет» деп аталган өзгөчө механизмди чоң жетишкендик катары атап өттү. Бул ыкма талаштуу аймактарды бир тарапка артыкчылык бербестен, биргелешип пайдаланууга жол ачып, Кыргызстан, Тажикстан жана Өзбекстан президенттеринин алгачкы тарыхый саммитин өткөрүүгө жана «Худжанд достук декларациясын» кабыл алууга өбөлгө түздү.
Спикер аймактагы негизги кооптуу чакырыктар катары чек ара аралык кылмыштуулукту, терроризмди жана Афганистандагы туруксуздукту атады. Ал коңшу өлкөлөрдүн күч органдары ортосунда маалымат алмашууну жана алдын алуу чараларын күчөтүүнү сунуштап, Кыргызстан, Казакстан жана Өзбекстан жарандарынын ID-карта аркылуу чек араны тоскоолдуксуз кесип өтүү мүмкүнчүлүгүн ишенимдин айкын белгиси катары баалады.
Экономикалык жаатта Кыргызстан соодадагы тоскоолдуктарды жоюуну, бирдиктүү транзиттик жолдорду курууну, санарип соодасын жайылтууну жана айыл чарба, өнөр жай, инновациялык тармактардагы биргелешкен долбоорлорду ишке ашырууну маанилүү деп эсептейт.
Ошондой эле ал Борбор Азия өнөр жай парктары альянсын түзүү демилгесин сунуштап, анын негиздөөчү жыйыны жыл аягына чейин Бишкекте өтөрүн билдирди.
