Бишкек, 23.06.25. /Кабар/. БУУнун климаттын өзгөрүшү боюнча Бонн конференциясынын 62-сессиясынын алкагында Кыргызстан Тоо өнөктөштүгүнүн катчылыгы менен биргеликте "Чокулардын артында: тоолордо климаттын өзгөрүшүнө каршы аракеттенүү үчүн кызыкдар тараптарды мобилизациялоо" аттуу тематикалык иш-чара уюштурду.
Иш-чарага Непал, Бутан, Андорра, Эквадор, Армения, Тажикстан, Казакстан жана Азербайжан сыяктуу тоолуу өлкөлөрдүн, ошондой эле БУУнун Климаттын өзгөрүшү боюнча алкактык конвенциясы (КӨАК), ICIMOD, INBAR жана башка эл аралык уюмдардын өкүлдөрү катышты.
Иш-чаранын ачылышында Кыргыз Республикасынын президентинин Тоолуу аймактарды өнүктүрүү боюнча беш жылдык иш-аракеттерди ишке ашыруу боюнча атайын өкүлү Динара Кемелова ушул жылдын апрель айында Бишкек шаарында Глобалдык тоо диалогу өткөнүн белгилеп, өлкөлөрдү, эл аралык уюмдарды Кыргыз Республикасынын Президенти тарабынан айтылган "БУУ-Тоолор" координациялык механизмин, Тоолуу өлкөлөрдү өнүктүрүү фондун, "Тоолуу жаштар, аялдар жана климат" эл аралык платформасын түзүү боюнча демилгелерди колдоого чакырды.
Мындан тышкары, ал БУУнун КӨАК алкагындагы учурдагы программалардын жана механизмдердин алкагында күч-аракеттерди бириктирүүнү, тоолуу жамааттардын кызыкчылыктарын илгерилетүүнү жана тоолуу экосистемаларды коргоону сунуштады. Кыргыз делегациясынын башчысы ошондой эле Тоолуу аймактарды өнүктүрүү боюнча беш жылдык иш-аракеттерди ишке ашыруунун жүрүшү жана андан аркы кадамдар жана кызматташуунун келечеги, анын ичинде 2027-жылы "Экинчи Бишкек глобалдык тоо саммитин" даярдоо боюнча маалымат берди.
КР президентинин атайын өкүлү баштаган Кыргызстандын делегациясы Непал ICIMOD менен биргеликте уюштурулган тоолордун туруктуулугун жогорулатуу боюнча: «Адаптация көрсөткүчтөрү боюнча глобалдык максатка жетүү», ошондой эле Казакстан тарабынан уюштурулган «Климаттын өзгөрүшүнө каршы аймактык аракеттерди тездетүү: 2026-жылдагы климаттын өзгөрүшү боюнча аймактык саммитке карай» деген тематикалык иш-чараларга катышты.
Кыргыз делегациясы сүйлөшүү процесстеринде тоо күн тартибин илгерилетүү максатында Индия, Австрия, Эквадор, Пакистан, Андорра, Армения, Бутан, Лаос, Шри-Ланка, Непал, Буркина Фасо, Мали, Танзания, Азербайжан жана башка өлкөлөрдүн делегация башчылары менен бир катар эки тараптуу консультацияларды өткөрдү. Ошондой эле Бонн конференциясынын ар кандай сессияларында сөз сүйлөп, климаттын өзгөрүшү шартында өнүгүп келе жаткан өлкөлөрдүн жана тоолуу аймактардын көйгөйлөрүн козгоду.
Маалымат үчүн: ICIMOD – Тоолуу аймактарды комплекстүү өнүктүрүүнүн эл аралык борбору INBAR – Бамбук жана ротанг боюнча эл аралык уюм.
