Бишкек, 31.07.26. /Кабар/. Бүгүн, 31-июлда Кыргызстандын биринчи айымы Айгүл Жапарова Азербайжандын биринчи айымы Мехрибан Алиева жана Өзбекстандын биринчи айымы Зироат Мирзиёева менен биргеликте Чолпон-Ата шаарындагы “Алтын балалык” ден соолукту чыңдоо жана реабилитациялоо борборуна барышты.
Борбордо биринчи айымдар билим берүү боюнча мастер-класстардын иши менен таанышып, балдар менен баарлашып, чыгармачылык сабактарга катышышты. Аларга улуттук оюндардын негизинде майда моториканы жана логикалык ой жүгүртүүнү өнүктүрүүгө багытталган оюндар, ошондой эле робототехника жана билим берүүнүн башка заманбап багыттары боюнча сабактар көрсөтүлдү.
Мындан тышкары, биринчи айымдарга ден соолукту чыңдоо жана реабилитациялоо борборунун ишмердүүлүгү, анын негизги багыттары жана ишке ашырылып жаткан программалары тууралуу маалымат берилди.
Программанын өзүнчө бөлүгү Кыргызстандын салттуу маданияты жана элдик кол өнөрчүлүгү менен таанышууга арналды.
Иш-чаранын соңунда биринчи айымдар пирсте жайгашкан көркөм сүрөт галереясына барышты. Анда Кыргызстан, Азербайжан жана Өзбекстандын элдеринин достугуна арналган жаш сүрөтчүлөрдүн эмгектери коюлган.
