Бишкек, 31.05.25. /Кабар/. "Ыр майрам" эл аралык фестивалынын алкагында Баткен шаарынын борбордук стадионунда чоң концерт өттү.
Президенттин Баткен облусундагы өкүлчүлүгүнөн билдиришкендей, алгач үч элдин ынтымагын чагылдырган сахналаштырылган көрсөтүү тартууланды.
Майрамдык иш-чараны президенттин Баткен облусундагы өкүлү Айбек Шаменов ачып, кошуна жашаган үч элди тынчтыкты жар салган "Ыр майрам" менен куттуктады.
Майрамдын расмий бөлүгүндө Өзбекстандын Фергана облусунун башчысы Хайрулло Бозаров жана Тажикстандын Согди облусунун аткаруу бийлигинин төрагасынын орун басары Зайнура Азими сөз сүйлөп, бул иш-чаранын кошуна элдердин өз ара ишенимин жана ынтымагын бекемдөөдө мааниси зор экенин белгилешти.
Гала-концертте Кыргызстандан белгилүү ырчылар - Саламат Садыкова, Роза Аманова, Ырыскелди Осмонкулов, Самара Каримова, Аскат Мусабеков, Миргүл Асаналиева, Нурлан Насип жана башка ырчылар таланттарын тартуулады.
Өзбектандан легендарлуу Ялла тобунун солисти Фаррух Закиров, Севинч Муминова элге жагымдуу маанай тартуулады.
Тажикстандан Дилноза Каримова, Хасан Камол, Шерози Камол жана башка ырчылар, бийчилер катышты.
Белгилей кетсек, Баткенде "Ыр майрам" эл аралык фестивалы өттү, иш-чара кошуна жашаган кыргыз-өзбек-тажик элдеринин ынтымагын, өз ара ишенимин бекемдөө, жакын кошуналардын карым-катнашын чыңдоо, чектеш облустар ортосунда кызматташууну өнүктүрүү максатын көздөйт.
Анын алкагында туристтик көргөзмө-жарманке уюштурулуп, анда Баткен облусунун аймагынан келген ишкерлер өндүргөн продукцияларын, кол өнөрчүлөр эмгектерин жайышты. Ошондой эле аймактын айымдары улуттук тамаш-аштарын, дыйкан-багбандары айыл чарба продукцияларын көрсөтүштү.
