Бишкек, 20.12.25. /Кабар/. КР президентине караштуу Инвестициялар боюнча улуттук агенттик «Борбор Азия + Япония» эл аралык бизнес-форумунун уюштуруучуларынын бири болуп эсептелинет.
Агенттиктин билдиришкендей, бизнес форум президент Садыр Жапаровдун Японияга болгон расмий сапарынын алкагында уюштурулду.
Токио шаарында өтүп жаткан форум Борбор Азия өлкөлөрү менен Япониянын ортосундагы соода-экономикалык жана инвестициялык кызматташууну кеңейтүүгө багытталган жана мамлекеттик органдардын, ишкер чөйрөнүн жана эксперттик коомчулуктун өкүлдөрүн бириктирет.
Форумга Кыргызстандан 50гө жакын бизнес-коомчулуктун өкүлдөрү катышууда.
Улуттук агенттиктин башчысы Равшанбек Сабиров «Борбор Азия + Япония» форматы байланыштарды чыңдоодо маанилүү экенин жана Кыргызстан инновациялык долбоорлорду ишке ашырууга кызыкдар экенин белгиледи.
Форумдун ишкердик программасынын алкагында туруктуу өнүгүү, «жашыл» экономиканы калыптандыруу, санариптештирүү, IT-индустрияны өнүктүрүү, ошондой эле адамдык капиталды жана билим берүү тармагын өнүктүрүү маселелери каралууда.
Иш-чаранын негизги максаты эки тараптуу документтерге кол коюу менен, тараптардын өз ара ишениминин жогорку деңгээлин жана өнөктөштүк мамилелерди мындан ары тереңдетүүгө умтулуусуна багытталган.
Бизнес-форумдун алкагында 20дан ашуун эки тараптуу документтерге кол коюлду.
«Борбор Азия + Япония» бизнес-форумун өткөрүү тараптардын соода-экономикалык байланыштарды кеңейтүүгө, инвестиция тартууга жана Кыргызстан менен Япониянын узак мөөнөттүү стратегиялык өнөктөштүгүн бекемдөөгө болгон умтулуусун көздөйт.
