Бишкек, 13.03.25. /Кабар/. Кыргыз-тажик чек арасында майрамдык маданий иш-чаралар өтүүдө. Бул тууралуу президенттин Баткен облусундагы өкүлчүлүгүнөн кабарлашты.
Маалыматка ылайык, Нооруз майрамын утурлай кыргыз-тажик чек арасынын расмий ачылуусуна карата Баткен жана Согди облусунун чектешкен аймагында майрамдык иш-чаралар уланууда.
Ага президенттин Баткен облусундагы ыйгарым укуктуу өкүлү Айбек Шаменов жана Тажикстандын Согди облусунун төрагасы Раджаббой Ахмадзода баштаган чектеш райондордун башчылары жана кыргыз-тажик элдери катышууда.
Облус башчылары кошуна жашаган эки элди бул тарыхый күн менен куттуктап, алдыда ынтымакты бекемдөө, ар тараптуу кызматташууну жандантуу аракеттери көрүлөрүн айтышты.
Сүмөлөк кайнап, улуттук тамак-аш жана кол өнөрчүлүк көргөзмөлөр уюштурулду.
Жергиликтүү таланттар улуттук ыр-бийлерди аткарышты.
Белгилей кетсек, бүгүн кыргыз-тажик чек арасындагы “Кайрагач” жана “Кызыл-Бел” көзөмөл-өткөрүү пункттарынын иши жанданды. Аталган бекеттер 2021-жылдын май айынан бери жабык турган.
