Бишкек, 04.10.25. /Кабар/. Бүгүн президенттин Ош облусундагы өкүлү Элчибек Жантаев жаратылыш ресурстары, экология жана техникалык көзөмөл министри Медербек Машиев менен жолугушту.
Өкүлчүлүктөн билдиришкендей, жолугушууда Ноокат районундагы "Кыргыз-Ата" мамлекеттик жаратылыш паркында экотуризмди өнүктүрүү концепциясы талкууланды.
Иш-чарага министрдин жана өкүлдүн орун басарлары катышып, жаратылыш паркынын туристтик мүмкүнчүлүктөрүн кеңейтүү боюнча сунуштар жана пландар ортого салынды.
Белгилей кетсек, буга чейин 13-сентябрда министрлер кабинетинин төрагасынын орун басары – УКМКнын төрагасы Камчыбек Ташиевдин жумушчу сапарынын алкагында Ноокат районундагы “Кыргыз-Ата” жаратылыш паркына барган. Иш сапардын жүрүшүндө паркты өнүктүрүүгө багытталган бир катар тапшырмалар берилген.
Атап айтканда:
- Кара-Кой эс алуу жайына саркынды суу чыгаруу системасын куруу;
- боз үйлөр шаарчасын жана эс алуучу комплекстерди түзүү;
- туристтерге ыңгайлуу шарттарды түзүү боюнча бир катар долбоорлорду иштеп чыгуу.
Бүгүнкү жыйын ушул тапшырмаларды ишке ашыруунун жол-жоболорун, техникалык жана инвестициялык мүмкүнчүлүктөрүн талкуулоого арналды.
