Бишкек, 19.06.25. /Кабар/. Бишкек шаарынын Ак-Ордо конушунда жаңы мектеп жана бала бакчанын курулушу уланууда. Бул тууралуу Курулуш, архитектура жана турак жай-коммуналдык чарба министрлигинен билдиришти.
Маалыматка ылайык, мында 750 окуучуга ылайыкталган мектептин жалпы аянты 6416 чарчы метрге барабар. 3 кабаттуу 4 блоктон турган билим берүү уюму заманбап талаптарга жооп берет,окуучулар, мугалимдер үчүн бардык шарттар толук каралган.
Мындан тышкары, эки кабаттуу эки блоктон турган 280 орундуу жаңы бала бакча курулууда. Имараттын жалпы аянты 1816 чарчы метрди түзөт.
Учурда социалдык объектилердеги курулуш иштеринин 40 пайызы аяктап калды.
