Бишкек, 14.07.26. /Кабар/. Башкы прокурор Малик Бектурганов курулуш тармагында иш жүргүзгөн ишкердик субъекттеринин өкүлдөрү менен жолукту.
Башкы прокуратурадан билдиришкендей, жолугушуу ишкердикти коргоо боюнча мамлекеттик саясатты ишке ашыруунун, ошондой эле мамлекеттик органдардын бизнестин ишине негизсиз кийлигишүүсүнө жол бербөөгө багытталды.
Жолугушуунун жүрүшүндө мамлекеттик органдар тарабынан жер тилкелерин берүүдө, уруксат берүүчү документтерди тариздөөдө, курулуш долбоорлоруна экспертиза жүргүзүүдө жана контролдук-көзөмөлдөө функцияларын жүзөгө ашырууда мыйзам талаптарынын сакталышы маселелери каралды.
"Административдик жол-жоболордун мыйзамда белгиленген мөөнөттөрүнүн сакталышына, кабыл алынган чечимдердин мыйзамдуулугуна жана негиздүүлүгүнө, ошондой эле Кыргызстандын президентинин ишкердик субъекттерине карата текшерүүлөрдү жүргүзүүгө киргизилген мораторий жөнүндө актыларынын талаптарынын аткарылышына өзгөчө көңүл бурулду", - деп айтылат маалыматта.
Жолугушуунун жыйынтыгы боюнча Башкы прокуратуранын түзүмдүк бөлүмдөрүнө келтирилген жүйөлөрдү текшерүү, ыйгарым укуктуу мамлекеттик органдардын аракеттерине укуктук баа берүү жана негиздер болгон учурда прокурордук чара көрүү тапшырылды.
Мыйзамдарды жана административдик жол-жоболорду өркүндөтүүнү талап кылган системалуу маселелер тиешелүү мамлекеттик органдар менен биргеликте иштелип чыгат.
Берилген тапшырмалардын аткарылышы көзөмөлгө алынды.
