Бишкек, 19.06.26. /Кабар/. Кадамжай районунда Бүргөндү магистралдык каналын кеңейтүү жана реконструкциялоо иштери башталды.
Президенттин Баткен облусундагы өкүлчүлүгүнөн билдиришкендей, бул маселе Элдик курултайдын делегаттары тарабынан көтөрүлгөн.
1976-жылы курулган каналды жаңылоо долбоору ири көлөмдө болгондуктан, жумуш үч этап менен жүрөт. Биринчи этапты ишке ашырууга мамлекет тарабынан 1 млрд 579 млн сом каралган.
"Учурда курулушка керектүү материалдарды өндүрүү үчүн асфальт-бетон заводу курулуп, даярдыктар көрүлүүдө. Негизги бетон курулмалары сугат мезгили аяктаган соң орнотула баштайт", - деп айтылат маалыматта.
Долбоор толугу менен ишке ашкандан кийин каналдын узундугу 31 чакырымдан 49 чакырымга чейин узарып, суу өткөрүү мүмкүнчүлүгү секундуна 18 куб метрден 30 куб метрге чейин көбөйтүлөт. Ошондой эле 10 миң гектардан ашуун сугат жерин суу менен камсыздоо жакшырып, 2 миң гектар жаңы жер өздөштүрүлөт.
Белгиленгендей, бул ири долбоор аймактагы сугат суу тартыштыгын чечип, айыл чарба өндүрүшүнүн көлөмүн жогорулатууга шарт түзөт.
