Бишкек, 11.04.25. /Кабар/. Бүгүн Кыргызстандын тышкы иштер министри Жээнбек Кулубаев Казакстандын Алматы шаарында өткөн Борбордук Азия мамлекеттери менен Россиянын Тышкы иштер министрлеринин сегизинчи жолугушуусуна катышты.
ТИМден билдиришкендей, иш-чаранын жүрүшүндө тараптар 2022-жылдын октябрында өткөн Борбордук Азия мамлекет башчылары менен Россиянын биринчи саммитинин алкагында жетишилген макулдашуулардын ишке ашырылышы боюнча маселелерди талкуулашты.
Жээнбек Кулубаев алты тараптуу кызматташууну жогору баалап, жүк ташууларды өнүктүрүүгө жана эмгек мигранттарынын эркин жүрүшүнө тоскоол болгон чектөөлөрдү жана тоскоолдуктарды алып салуунун маанилүүлүгүн өзгөчө белгиледи.
