Бишкек, 30.07.26. /Кабар/. Күн мурун Башкы прокуратурада 2025-2030-жылдарга карата Коррупцияга каршы аракеттенүү боюнча мамлекеттик стратегияны ишке ашыруу боюнча ведомстволор аралык жумушчу топтун отуруму өткөрүлдү.
Башкы прокуратурадан билдиришкендей, отурумга президенттин администрациясынын, президентке караштуу Коррупцияга каршы ишкердик кеңештин, сот, укук коргоо, контролдоочу жана башка мамлекеттик органдардын өкүлдөрү катышты.
Анда стратегиянын 2026-жылдын биринчи жарым жылдыгындагы аткарылышынын жыйынтыгы боюнча мамлекеттик органдардын ишмердүүлүгүнө баа берилип, айрым иш-чаралардын өз убагында аткарылбай калышынын себептери жана аныкталган кемчиликтер талкууланып, аларды жоюу жана иштин натыйжалуулугун жогорулатуу боюнча тиешелүү чаралар белгиленди.
Ведомстволор аралык жумушчу топтун төрагасы Залкарбек Акназаров мамлекеттик стратегияда каралган иш-чараларды өз убагында жана сапаттуу аткаруунун маанилүүлүгүнө көңүл буруп, аны ишке ашырууда мамлекеттик органдардын жоопкерчилигин баса белгилеп өттү.
Мындан тышкары, мамлекеттик органдардын жетекчилери үчүн коррупциянын алдын алуу, коррупциялык тобокелдиктерди башкаруу, кызыкчылыктардын кагылышуусун жөнгө салуу жана ички коррупцияга каршы иштерди уюштуруу маселелери боюнча практикалык окутуу өткөрүлдү.
Белгилей кетсек, мамлекеттик стратегия президенттин жарлыгы менен бекитилген. Аны ишке ашыруу боюнча мамлекеттик органдардын ишин координациялоо Башкы прокуратура тарабынан жүзөгө ашырылат.
