Бишкек, 29.04.26. /Кабар/. Ош шаарында чет өлкөдө ишке орноштуруу борборунун жаңы имараты ачылды. Бул тууралуу мэриядан билдиришти.
Жаңы имарат Эмгек, социалдык камсыздоо жана миграция министрлигинин көмөгү менен ачылды.
Жаңы борбор жарандарды мыйзамдуу жана коопсуз түрдө чет өлкөдө ишке орноштурууга багытталып, маалыматтык-кеңеш берүү, документтерди даярдоо жана коштоо кызматтарын көрсөтөт. Мындай шарттар жарандардын укуктарын коргоого, мыйзамсыз миграциянын алдын алууга жана эмгек рыногунда атаандаштыкка жөндөмдүүлүгүн жогорулатууга өбөлгө түзөт.
Белгилей кетсек, борбордун ачылышы калктын жумуш менен камсыз болуусун жакшыртууга жана тышкы эмгек миграциясын жөнгө салууга багытталган мамлекеттик саясаттын алкагында ишке ашырылды.
