Бишкек, 11.09.25 /Кабар/. Бишкек шаарындагы Улуттук эне жана баланы коргоо борборунда Rebless™ Planar инновациялык реабилитациялык жабдуусун расмий тапшыруу аземи болуп өттү.
Саламаттык сактоо министрлигинен билдиришкендей, бул жабдуу Кореянын эл аралык кызматташтык агенттиги KOICA жана H Robotics компаниясынын колдоосу менен Кыргызстанга гуманитардык жардам катары алынып келди.
Жабдуунун жалпы наркы 150 миң АКШ долларын түзөт.
Rebless™ Planar — бул неврологиялык жана ортопедиялык оорулардан кийин бейтаптардын кыймыл-аракетин жана булчуң күчүн калыбына келтирүү үчүн колдонулуучу жогорку технологиялуу робот-тренажёр. Ал өзгөчө балдардын реабилитациялык дарылоосунда натыйжалуу колдонула турган заманбап аппарат болуп эсептелет.
Иш-чарага катышкан Кыргыз Республикасынын саламаттык сактоо министри Эркин Чечейбаев Корея өкмөтүнө, KOICA уюмуна жана H Robotics компаниясына ыраазычылык билдирди.
«Бул жабдуу балдардын заманбап калыбына келтирүүчү дарылоого жеткиликтүүлүгүн кеңейтет жана медициналык жардамдын натыйжалуулугун жогорулатат», — деди министр.
