Бишкек, 26.07.25. /Кабар/. Өзгөчө кырдаалдар министрлиги сууга түшүүдө эске алуучу айрым эрежелерди эске салды.
Ага ылайык, жайкы эс алуу мезгилинде сууга түшүү учурунда төмөнкү эрежелерди сактоо зарыл:
- Жаш балдарды кароосуз калтырбаңыз. 12 жашка чейинки балдардын жанында сөзсүз түрдө аларды көзөмөлдөгөн чоң киши болушу шарт.
- Мурда көрүп-билбеген, балыры көп жерге түшүүгө болбойт. Себеби андай жерлерде чуңкур, курч таштар же башка кооптуу нерселер болушу ыктымал.
- Спирт ичимдиктерин ичип алып сууга түшпөңүз. Спирт ичимдиктери адамдын реакциясын жайлатып, кыймыл-аракетин начарлатат. Бул сууда сүзүү учурунда өтө кооптуу жагдайларды жаратышы мүмкүн.
- Аба ырайы бузулуп, күн бүркөлүп, же катуу шамал башталганда сууга түшүүдө сак болуңуз. Аба ырайынын өзгөрүшү ар кандай кооптуу кырдаалдарга алып келиши ыктымал.
- Тамакка тоюп алып сууга түшүүгө болбойт. Анткени, тамак сиңирүү процесси организмди алсыратып, булчуңдардын иштөөсүнө тоскоолдук жаратышы мүмкүн. Андыктан тамактангандан кийин бир аз эс алып, жок дегенде бир-эки сааттан кийин сууга түшкөнүңүз оң.
- Белгиленген чектен алыс сүзүп кетпеңиз. Бул чектер сиздин коопсуздугуңуз үчүн коюлган. Эгер сиз андан ашып кетсеңиз, куткаруучулар сизге жардам бере албай калышы мүмкүн.
- Эгер өзүңүздү начар сезип жатсаңыз, сууга түшпөй эле койгонуңуз оң болот.
