Бишкек, 09.10.25. /Кабар/. Быйыл өлкө аймагы боюнча 1563 изилдөө иштери жүргүзүлүп, 395 атайын эскертме жөнөтүлгөн. Бул тууралуу Өзгөчө кырдаалдар министрлигинин коллегиясында министрдин орун басары Акылбек Мазарипов билдирди.
Анын айтымында, бүгүнкү күндө он эки миңге жакын ар кандай табигый мүнөздө кооптуу процесстер бар.
“2025-жылдын 9 айында жалпы 1563 изилдөө иштери жүргүзүлгөн, анын ичинен эң көп санда сел жана суу ташкындоо процесстерине 798 изилдөө иштери жүргүзүлүп, бул жалпы изилдөөлөрдүн 51%ын түздү. Ал эми жер көчкү процесстерине 245 изилдөө иштери жүргүзүлгөн. Изилдөөлөрдүн жыйынтыгы боюнча 1039 корутунду чыгарылып, 395 атайын эскертме каттары мамлекеттик жана жергиликтүү бийлик органдарына жөнөтүлгөн”, - деп белгиледи ал.
