Бишкек, 10.06.25. /Кабар/. Бүгүн Бишкектин Көк-Жар конушунда №13 жаңы үй-бүлөлүк медицина борбору ачылды.
Саламаттык сактоо министрлигинен билдиришкендей, имараттын жер төлөсүндө Бишкек шаардык медициналык тез жардам борборунун жаңы №6 тез жардам көмөк чордону жайгашты.
Ачылыш аземине саламаттык сактоо министри Эркин Чечейбаев, Бишкек шаарынын мэри Айбек Жунушалиев, жашоочулар, ошондой эле борбордогу саламаттыкты сактоо уюмдарынын жетекчилери катышты.
Саламаттык сактоо министри Эркин Чечейбаев өз сөзүндө медициналык кызматтардын жеткиликтүүлүгүн жогорулатуунун маанилүүлүгүн белгилеп, жаңы саламаттыкты сактоо мекемелеринин ачылышы оорулардын алдын алууга басым жасоо менен коштолушу керектигин белгиледи.
№13 үй-бүлөлүк медицина борбору нөөмөтүнө 150 адамды кабыл алууга ылайыкталган заманбап көп профилдүү амбулатордук мекеме болуп саналат. Аталган мекеме Көк-Жар, Алтын-Ордо, Рухий-Мурас, Кара-Жыгач конуштарында, ошондой эле Тунгуч, Көк-Жар, Улан кичи райондорунда жана башка чектеш аймактарда жашаган 80 миңден ашык калкты тейлейт.
Бул жерде жалпы практикалык дарыгерлер, педиатрлар, акушер-гинекологдор, ошондой эле адистер: кардиолог, невропатолог, окулист, хирург, уролог, отоларинголог, эндокринолог, онколог, психиатр, психолог жана башка 120 дарыгер эмгектенет.
Ал эми имараттын жер төлөсүндөгү №6 тез жардам көмөк чордону күнү-түнү иштеген беш жалпы тез жардам бригадасын жайгаштырууга арналган жана борбордун түштүк-чыгыш бөлүгүнүн жашоочуларына тез жардам көрсөтүүнүн эффективдүүлүгүн олуттуу жогорулатууга багытталган.
Жакын арада УЗИ, рентген аппараттары, лабораториялык жабдуулар кошумча сатып алынып, кызматтардын толук спектрин камсыз кылуу үчүн борборго өткөрүлүп берилет.
№13 үй-бүлөлүк медицина борборунун жана №6 тез жардам көмөк чордонунун ачылышы шаардын саламаттыкты сактоо тармагын өнүктүрүүгө жана борбор калаанын он миңдеген тургундарына медициналык кызмат көрсөтүүнүн сапатын жогорулатууга кошкон маанилүү салым болуп саналат.
