Бишкек, 03.07.26 /Кабар/. Бишкекте заманбап маданий борбордун курулушу жигердүү уланууда.
Муниципалитеттен билдиришкендей, долбоорго ылайык, жалпы аянты 7 490 чарчы метрди түзгөн заманбап үч кабаттуу имарат, анын айланасында 92 унаага ылайыкталган унаа токтотуучу жай курулат.
"Анда 420 орундуу кинотеатр жана 330 орундуу көргөзмө залы, музыкалык жана театралдык ийримдер үчүн атайын класстар, заманбап фуд-корт жана маданий-коомдук иш-чараларды өткөрүүчү көп функционалдуу аянтчалар болот", - деп айтылат маалыматта.
Белгиленгендей, бүгүнкү күндө объектинин жер төлө бөлүгүнүн темир-бетон каркасы толугу менен аяктап, биринчи кабаттын колонналарын орнотуу, кабат аралык жабууну бетондоого даярдык көрүү жана топуракты кайра толтуруу иштери кызуу жүрүп жатат.
