Бишкек, 30.12.25. /Кабар/. Кемин районунун Боролдой айылында Кызыл китепке кирген сейрек кездешүүчү жырткыч — ак илбирс байкалган.
Жаратылыш ресурстары, экология жана техникалык көзөмөл министрлигинен билдиришкендей, окуя 29-декабрда кечки саат 23:20 чамасында катталган.
Алынган маалыматка ылайык, ак илбирс айыл аймагына кирип, бакка чыгып кеткен.
Окуя болгон жерге министрликтин Чүй регионалдык башкармалыгынын кызматкерлери барып, жаныбарды коопсуз шартта бактан түшүрүшкөн.
Ак илбирс — Кыргызстан үчүн өзгөчө мааниге ээ символдук жаныбар болуп саналат жана анын ар бир катталышы биологиялык ар түрдүүлүктү сактоо багытында маанилүү окуя болуп эсептелет.
