Бишкек, 13.06.25. /Кабар/. Кыргызстанда сейсмоизолятор чыгарган завод курулат. Бул тууралуу курулуш, архитектура жана турак жай-коммуналдык чарба министри Нурдан Орунтаев билдирди.
Анын айтымында, бүгүн Кытай компаниясы менен 10 млн АКШ долларына келишим түзүлгөн.
"Кыргызстанда Курулуш министрлигинин базасында сейсмоизоляторлор чыгаруу боюнча завод курулат. Башкаруу 51/49 пайыз менен. 51 пайыз мамлекеттин пайызы болот.
Ушул эле келишимдин негизинде жер кыртышын изилдөө боюнча 3 мобилдик жана 3 лаборатория болот.
Андан тышкары 1,5 млн доллар мамлекетке грант келет. Ал акча каражат Курулуш министрлигинин жабдыктарын алууга жана имараттарын курууга колдонулат.
Келишимдин аткаруу мөөнөтү 90 күн. Ал убакытта 11,5 млн АКШ долларын Кыргызстанга алып келишет",-деди ал.
Ошондой эле келишимдин иштөө мөөнөтү 7 жылга түзүлүп, ал убакыттан кийин баардык имараттар жана жабдыктар толук мамлекетке өткөрүлөрү кошумчаланды.
