Бишкек, 12.11.25. /Кабар/. Учурда Казакстандын Мажилиси биринчи окууда Санариптик кодекстин долбоорун карап жатат. "Казинформ" агенттигинин маалыматына ылайык, депутат Асхат Аймагамбетов социалдык тармактарда каттоо үчүн жаш курагына чектөө киргизүүнү сунуштады.
Депутаттын айтымында, Казакстанда балдар көбүнчө 5 же 6 жашында эле ата-энесинин макулдугусуз, текшерүүсүз же башка чектөөлөрсүз TikTok жана Instagramга катталышат.
"Башка өлкөлөр мындай чектөөлөрдү кабыл алышкан. Мисалы, Дания менен Австралияда каттоого 15 же 16 жаштан баштап уруксат берилет, ал эми АКШда, Англияда жана Ирландияда ата-энелердин атайын уруксаты жана текшерүүсү талап кылынат. Биз мындай жобону ушул мыйзамдын алкагында киргизе алабыз", - деди Аймагамбетов Жасалма интеллект министрлигине жана Билим берүү министрлигине кайрылып.
Андан тышкары, парламентарий билим берүү мекемелеринде смартфондорду колдонуу маселесин көтөрдү.
Ал мындай чектөөлөр Англия менен Нидерландияда мурунтан эле бар экенин, ал эми Казакстандын алдыңкы мектептери - НИШ, БИЛ жана башкалар смартфондорду колдонууга тыюу салганын, бул окуучулардын окуудагы жетишкендиктерине оң таасирин тийгизгенин белгиледи.
Жасалма интеллект жана санариптик өнүктүрүү боюнча вице-министр Дмитрий Мун министрлик социалдык тармакта каттоону түздөн-түз чектөө пландалбаганын, бирок контенттин балдарга жеткиликтүүлүгүн жөнгө салуу боюнча иштер жүрүп жатканын билдирди.
«Азыркы учурда ыкма ар түрдүү жеткиликтүүлүк деңгээлдерин берүүгө — контентти чектөөгө, бирок заманбап реалдуулукка ылайык өнүгүүнү токтотпоого багытталууда», — деди ал.
Мектептерде смартфондорго тыюу салууга байланыштуу Мун мындай чара Санариптик кодекстин долбооруна кирбегенин тактады.
"Технологияны, жасалма интеллектти жана интернетти колдонууда артта калуу коркунучунан качуу үчүн биз жаңы муунду технологияны туура колдонууну үйрөтүшүбүз керек", - деп кошумчалады вице-министр.
