Бишкек, 15.05.26. /Кабар/. Бүгүн Кыргыз футбол биримдигинин жаңы шайланган президенти Адылбек Касымалиев Кыргыз футбол биримдигинин жамааты жана курама командалардын машыктыруучулары менен таанышты.
Кыргыз футбол биримдигинен билдиришкендей, жолугушуунун жүрүшүндө өлкө футболун өнүктүрүү боюнча алдыдагы максаттар, стратегиялык багыттар жана пландар талкууланды. Өз сөзүндө КФБ президенти футбол тармагындагы бардык багыттарда системалуу иш алып баруу маанилүү экенин белгиледи.
"Алдыда өлкө футболун өнүктүрүүгө багытталган көптөгөн максаттар жана долбоорлор бар. Баарыңыздарга жемиштүү иш, жаңы ийгиликтерди жана алдыга коюлган пландардын ийгиликтүү ишке ашышын каалайм", - деди Адылбек Касымалиев.
Мындан тышкары, КФБ президенти футбол академиясынын аймагын, машыгуу инфратүзүмүн жана КФБнын кеңселерин кыдырып чыгып, учурдагы шарттар менен таанышты.
