Кыргызстандын чыгышында, Казакстан менен чектеш аймакта өлкөнүн эң кооз өрөөндөрүнүн бири – Каркыра жайлоосу жайгашкан. Чексиз жашыл жайыттар, Теңир-Тоонун бийик тоо кыркалары, тунук дарыялар жана таза аба бул аймакты саякатчылар үчүн эң жагымдуу жайлардын бирине айландырган.
Буга чейин Каркыра көбүнчө жайкы жайыттар, боз үйлөр жана көчмөн турмуш менен байланышып келген.
Бүгүнкү күндө өрөөн өзүнүн өзгөчө колоритин сактап калуу менен бирге, туристтик багыт катары да активдүү өнүгүүдө. Бул жерде салттуу боз үйлөр заманбап A-frame үлгүсүндөгү эс алуу үйлөрү, бардык шарттары бар коттедждер, конок үйлөрү жана эс алуу жайлары менен айкалышып турат.
Аймактын өнүгүшүндө транспорттук инфраструктураны жакшыртуу маанилүү роль ойноду. Өткөн жылдын күзүндө президент Садыр Жапаровдун катышуусунда Түп – Кеген автожолу пайдаланууга берилген. Дүйнөлүк банктын каржылоосу менен ишке ашкан долбоордун алкагында Түп – Кеген жана Каркыра – Турук – Сары-Жаз унаа жолдорунун тилкелери реконструкцияланган.
Заманбап талаптарга ылайык курулган жаңы жол Каркырага жетүүнү кыйла ыңгайлуу жана коопсуз кылып, туризмди өнүктүрүүгө жаңы мүмкүнчүлүктөрдү ачты.
Бүгүнкү күндө бул жайга жаратылышты сүйгөндөр, ат менен саякаттоону, тоо аралоону жана үй-бүлөлүк эс алууну жактыргандар көп келишет.
Ошол эле учурда Каркыра өзүнүн кайталангыс көркүн сактап келет: жайлоодо үйүр-үйүр жылкылар жайылып, өрөөндү карлуу тоо чокулары курчап турат. Ал эми жергиликтүү тургундар кыргыз элинин меймандостук салтын бүгүнкү күнгө чейин улантып келишет.
Биздин фоторепортаж – жаратылыштын ажайып кооздугу, кылымдарды карыткан салттар жана заманбап инфраструктура айкалышкан Кыргызстандын эң уникалдуу жайларынын бири болгон Каркыра жөнүндө.
